Sekawan Tandhanipun Tiyang Shaleh

Dening: Drs. H. Slamet Arifin, M.Ag. (PAIF Kab. Boyolali)

اَلْحَمْدُ لِلّٰهِ , اَلْحَمْدُ لِلّٰهِ الَّذِيْ هَدَانَا سُبُلَ السّلَامِ ، وَأَفْهَمَنَا بِشَرِيْعَةِ النَّبِيّ الْكَريمِ ، أَشْهَدُ أَنْ لَا اِلٰهَ إِلَّا الله وَحْدَهُ لَا شَرِيك لَه ، ذُو اْلجَلَالِ وَالْإكْرَام ، وَأَشْهَدُ أَنَّ سَيِّدَنَا وَنَبِيَّنَا مُحَمَّدًا عَبْدُهُ وَرَسوْلُهُ ، اَللّٰهُمَّ صَلِّ و سَلِّمْ وَبَارِكْ عَلَى مُحَمَّدٍ وَعَلَى اٰلِهِ وَأَصْحَابِهِ وَالتَّابِعِيْنَ بِإِحْسَانِ إلَى يَوْمِ الدِّيْنِ ، أَمَّا بَعْدُ : فَيَأَيُّهَا الْإِخْوَانِ ، أُوْصِيْكُمْ وَ نَفْسِيْ بِتَقْوَى اللهِ وَطَاعَتِهِ لَعَلَّكُمْ تُفْلِحُوْنَ .

قَالَ اللهُ تَعَالَى فِي الْقُرْآنِ الْكَرِيْمِ : أَعُوْذُ بِاللهِ مِنَ الشَّيْطَانِ الرَّجِيْمِ ، بِسْمِ اللهِ الرَّحْمٰنِ الرَّحِيْمِ :   يَآأَيُّهَا الَّذِيْنَ اٰمَنُوا اتَّقُوا اللهَ وَقُوْلُوْا قَوْلًا سَدِيْدًا ، يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوْبَكُمْ وَمَنْ يُّطِعِ اللهَ وَرَسُوْلَهُ فَقَدْ فَازَ فَوْزًا عَظِيْمًا , وَقَالَ تَعَالى يَآاَيُّهَا الَّذِيْنَ اٰمَنُوْا اتَّقُوْا اللهَ حَقَّ تُقَاتِهِ وَلَا تَمُوْتُنَّ إِلَّا وَأَنْتُمْ مُسْلِمُوْنَ . صَدَقَ اللهُ الْعَظِيْم .

Jama’ah Shalat Jum’at Rahimakumullah

Wonten ing kalodangan menika, sumangga sareng-sareng kita ngunjukaken puja saha puji syukur wonten ngarsa dalem Allah Subhanahu wata’ala ingkang sampun paring nikmat lan kasarasan satemah kitha gumbregah tumuju dhateng masjid nindaki kewajiban nindakaken shalat Jum’at.

Tanpa nikmat lan peparingipun Allah, saget-saget manah kita mboten anggadhahi krentek babar blas kangge tumuju dhateng masjid menika. Sedherek kita ing njawi mrika, saget ugi langkung sehat lan langkung kacekapan panggesanganipun, ananging kanthi enteng lan tanpa rumaos dosa nilaraken kegiatan jum’atan menika. Mugi-mugi, ketaatan kita menika dipun catet minangka amal shaleh ingkang saget pinangka pambantu kita mbenjang ing akhirat.

Ingkang nomer kaleh, sumangga sareng-sareng kita tansah mbudidaya ningkataken iman saha taqwa dhumateng Allah kanthi cara nindakaken sedaya dhawuhipun Allah Subhanahu wata’ala saha nilar awisan-awisanipun.

Jama’ah Shalat Jum’at Rahimakumullah

Sae lan awonipun gesang kita ing donya menika gumantung kalian tiyang-tiyang shaleh ingkang gesang ing donya sak menika. Samsaya kathah tiyang shaleh, samsaya sae panggesangan menika. Kosok wangsulipun samsaya sekedhik tiyang shaleh wonten ing donya menika, samsaya rawan ugi gesang kita ing donya. Awit menika para ulama, kyai lajeng kemawon sami balapan nyetak generasi tiyang shaleh kanthi pinten-pinten cara. Wonten ingkang liwat pondok pesantren, sekolah lan madrasah, TPQ, pengajian-pengajian, majelis taklim lan sak panunggalanipun.  Awit ngundi dhawuhipun Allah ing Al Qur’an Surat An Nisa’ ayat 9:

وَلۡيَخۡشَ ٱلَّذِينَ لَوۡ تَرَكُواْ مِنۡ خَلۡفِهِمۡ ذُرِّيَّةٗ ضِعَٰفًا خَافُواْ عَلَيۡهِمۡ فَلۡيَتَّقُواْ ٱللَّهَ وَلۡيَقُولُواْ قَوۡلٗا سَدِيدًا

 “Lan becik padha wediha marang Allah wong-wong kang saupamane padha ninggalake anak-anak keturunan ing mengkono padha apes-apes kang dheweke kabeh padha nguwatirake anak keturunane (yen ing mengkono anak keturunane padha urip kacingkrangan). Amarga saka iku, becik padha takwaha dheweke kabeh iku marang Allah, lan becik padha ngucapa, kanthi tetembungan kang bener.”

Setunggalipun priyagung Sayyid Abdullah bin Alawi Al-Haddad, ingkang nyusun kitab wirid Ratibul Haddad merang tiyang shaleh menika dados sekawan tandha-tandha. Inggih menika :

Tandha-tandha tiyang shaleh sepisan inggih menika;

عَابِدٌ مُسْتَقِيْمٌ زَاهِدٌ مُتَجَرِّدٌ ذُوْ مَعْرِفَةٍ بِاللهِ تَعَالَى كَامِلَةً وَبَصِيْرَةٍ فِي الدِّيْنِ نَافِذَةً

“Tiyang ahli ibadah ingkang lurus, lan istiqomah ing dalem ketaatan dhumateng Allah Subhanahu wata’ala.”

Tiyang shaleh jenis menika sanget ngutamakaken zuhud. Inggih menika nahan diri mboten mburu kanikmatan-kanikmatan donya. Gesangipun tiyang shaleh menika dipun sok aken namung mligi kangge ngawula dhumateng Allah kemawon. Wekdal saben dintenipun namung dipun isi kangge ngabekti dhumateng Allah lan tumindak sae dhateng sesami menungsa. Mboten wonten sekedik tetimbangan babagan bondha utawi urusan kadonyan.

Kajawi menika, tiyang kados punika biasanipun ma’rifat. Artosipun anggenipun ngenal Allah sampun mawi mata batin.

Jama’ah Shalat Jum’at Rahimakumullah

Tandha-tandha tiyang shaleh kaping kalih inggih menika; 

عَالِمٌ بِالشَّرْعِ ، رَاسِخُ الْقَدَمِ فِي اْلعِلْمِ بِاْلكِتَابِ والسُّنَّةِ يَعْمَلُ بِعِلْمِهِ وَيُعَلِّمُ النَّاسَ وَيَنْصَحُهُمْ ، وَيَأْمُرُ بِاْلمَعْرُوْفِ ، وَيَنْهَى عَنِ اْلمُنْكَرِ لَايُدَاهِنُ فِي الدِّيْنِ ، وَلَايَخْشَى فِي اللهِ لَوْمَةَ لَائِمٍ.

Tiyang alim ingkang jembar lan lebet pangertosanipun ing babagan masalah agami. Gesangipun saben dinten namung dipun isi kalian thalabul ilmi, maos kitab-kitab lan ngaji Al-Qur’an saha hadits, ugi ngapalaken nadham-nadham lan teks-teks saking para ulama.

Tiyang shaleh jinis menika sami tahap lajengipun badhe dipun sibukaken kalian ngamalaken ilmunipun lan ngajaraken dhateng tiyang ingkang wonten sakiwa tengenipun. Piyambakipun badhe ngorbanaken wekdal, tenaga, lan bandhanipun kangge mbela hukum-hukum ingkang sampun katetepaken dening Allah Subhanahu Wata’ala. Mboten wonten sekedik raos ajrih lan kuwatir kalebet dhateng para panguwasa ingkang saget njeblosaken ing pakunjaran. Ugi mboten sekedik kemawon anggadahi raos segan dhateng tiyang-tiyang sugih saget paring fasilitas ingkang mewah.

Tandha-tandha tiyang shaleh ingkang katiga inggih menika;

سُلْطَانٌ عَادِلٌ مُنْصِفٌ حُسْنُ السِّيْرَةِ صَالِحُ السَّرِيْرَةِ ، مُسْتَقِيْمُ السِّيَاسَةِ

Maksudipun: “Panguwasa ingkang adil, jujur, tumindakipun sae, jiwanipun resik, lan politikipun lurus.”

Mawi mergi politik, kados dene dados kepala desa, bupati, anggota DPR, ngantos presiden minangka salah satunggalipun kesempatan ageng kangge dados tiyang shaleh. Caranipun inggih menika liwat dados panguwasa lan pemimpin ingkang adil, jujur, ikhlas, saha sederhana utawi samadya.

Malah, ngendikanipun Rasulullah Shallallahu’alaihi wasallam:

“Pemimpin kang adil iku salah siji sangka kelompok kang paling awal mlebu ing suwargane Allah Subhanahu wata’ala sesuk.”

Pemimpin ingkang adil, mboten ngabdi ing kekuasaan, ananging namung ngabdi ing jejegipun  moral kangge tentrem lan karaharjan. Pemimpin ingkang adil, mboten ajrih kalian ancaman icalipun jabatan utawi kekuasan. Malah mboten ajrih dhateng ancaman rajapati saking lawan politikipun.

Tandha-tandha tiyang shaleh ingkang pungkasan utawi kaping sekawan inggih menika,

غَنِيٌّ صَالِحٌ لَهُ مَالٌ طَيِّبٌ وَاسِعٌ يُنْفِقُهُ فِيْ وُجُوْهِ اْلخَيْرَاتِ وَيُوَاسِي مِنْهُ الضُّعَفَاءَ وَالمَسَاكِيْنَ ويُسِدُّ مِنْهُ حَاجَاتِ اْلمُحْتَاجِيْنَ لَمْ يُمْسِكِ اْلمَالَ وَلَمْ يَجْمَعْهُ إلَا لِذَالِكَ، وَلِمَا فِي مَعْنَاهُ مِنَ الخَيْرَاتِ وَاْلمَكْرُمَاتِ.

Artosipun:

“Tiyang sugih ingkang shaleh. Bandhanipun dipun pikolehi saking cara ingkang sae lan resik. Lajeng dipun tasharrufaken kangge amal-amal kesaenan, kangge nyantuni kaum ringkih lan tiyang-tiyang miskin, ugi dipun ginakaken kangge nyekapi kebetahan tiyang-tiyang ingkang nandhang masalah.”

Kesibukan anggenipun makarya saha pados bandha mboten namung kangge megah-megahan, ananging namung niat kangge kebecikan-kebecikan saha kesaenan ingkang dipun tuntunaken kaleyan syariat agami Islam.

Jamaah Jumat rahimakumullah

Sekawan tandha-tandha tiyang shaleh menika sanget kabetahaken wonten ing panggesangan ing donya menika. Menawi salah setunggalipun komponen menika ical, mangka gesang wonten ing donya menika badhe ngalami pincang.

Mila, wonten ing gesang menika, kita mesthi kedah njagi tatanan ing masyarakat supados sekawan tandha-tandha tiyang shaleh menika mesthi wonten lan saget anggadahi peran sacara kompak ing ndalem panggesangan saben dintenipun. Wonten tiyang-tiyang ingkang ahli ibadah, ingkang tansah nyelak lan andhepe-dhepe dhumateng Allah Subhanahu Wata’ala, nyuwun keslametan lan kesaenan sedayanipun.

Ugi wonten tiyang-tiyang ‘alim ‘allamah ingkang tansah mbimbing umat tumuju dhateng margi ingkang leres. Wonten ugi para pemimpin ingkang adil, jujur lan resik. Ingkang pungkasan, ugi kedah wonten tiyang-tiyang sugih ingkang tansah nyiapaken bandhanipun kangge nulung fakir miskin lan perjuangan agami Islam.

Mugi-mugi kita saget mendhet pelajaran saking sekawan nasihat saking Waliyullah Abdullah al-Haddad babagan tiyang-tiyang shaleh punika.

Pangajab selajengipun, mugi-mugi kita saget mendhet peran lan posisi; minangka salah setunggal tiyang shaleh ingkang wonten ing tandha-tandha ingkang sampun kasebat menika. Aamiin yaa rabbal ‘aalamiin.

جَعَلَنا اللهُ وَإيَّاكُمْ مِنَ الْفَائِزِيْنَ الْأٰمِنِيْنَ ، وَأدْخَلَنَا وَإِيَّاكُمْ فِيْ زُمْرَةِ عِبَادِهِ الْمُؤْمِنِيْنَ : أعُوْذُ بِاللهِ مِنَ الشَّيْطَانِ الرَّجِيْمِ ، بِسْمِ اللهِ الرَّحْمٰنِ الرَّحِيْمِ : يَآ أَيُّهَا الَّذِيْنَ اٰمَنُوا اتَّقُوا اللهَ وَقُوْلُوْا قَوْلًا سَدِيْدًا باَرَكَ اللهُ لِيْ وَلَكُمْ فِي الْقُرْآنِ الْعَظِيْمِ ، وَنَفَعَنِيْ وَإِيَّاكُمْ بِالْأٰيَاتِ وَذِكْرِ الْحَكِيْمِ . إنَّهُ تَعاَلَى جَوَّادٌ كَرِيْمٌ مَلِكٌ بَرٌّ رَؤُوْفٌ رَحِيْمٌ .