Khutbah Jawa: Ngupadi Kasarasan Menungso

Dening: Drs. H. Slamet Arifin, M.Ag. (PAIF Kab. Boyolali)

إِنَّ الْحَمْدَ لِلّٰهِ نَحْمَدُهُ وَنَسْتَعِيْنُهُ وَنَسْتَغْفِرُهُ ، وَنَعُوْذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا ، مَنْ يَهْدِ اللهُ فَلَا مُضِلَّ لَهُ وَمَنْ يُضْلِلْ فَلَا هَادِيَ لَهُ . أَشْهَدُ أَنَّ لَا إِلٰهَ إِلَّا اللهُ وَحْدَهُ لَا شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ . اَللّٰهُمَّ صَلِّ وَسَلِّمْ عَلَى نَبِيِّنَا وَرَسُوْلِنَا مُحَمَّدٍ صَلَّى اللهُ عَلَيْهِ وَسَلَّمَ وَعَلَى اٰلِهِ وَأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدِّيْنِ . يَآ أَيُّهَا النَّاسُ اتَّقُوْا رَبَّكُمْ الَّذِيْ خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيْرًا وَنِسَاءً وَاتَّقُوا اللهَ الَّذِيْ تَسَاءَلُوْنَ بِهِ وَالْأَرْحَامَ إِنَّ اللهَ كَانَ عَلَيْكُمْ رَقِيْبًا . يَآ أَيُّهَا الَّذِيْنَ اٰمَنُوا اتَّقُوا اللهَ حَقَّ تُقَاتِهِ وَلَا تَمُوْتُنَّ إِلَّا وَأَنْتُمْ مُسْلِمُونَ. يَآ أَيُّهَا الَّذِيْنَ اٰمَنُوا اتَّقُوا اللهَ وَقُوْلُوْا قَوْلًا سَدِيْدًا ، يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوْبَكُمْ وَمَنْ يُطِعِ اللهَ وَرَسُوْلَهُ فَقَدْ فَازَ فَوْزًا عَظِيْمًا.

Ma’asyiral Muslimin Rahimakumullah

Sumangga kita dherekaken unjukaken raos syukur wonten ing ngarsa dalem Allah Subhanahu wa Ta’ala, kanthi bukti nambahi anggen sami takwa dhumateng Allah wonten ing sadhengah papan saha panggenan lan wonten ing kawontenan kados menapa kemawon. Kula panjenengan sarujuk menawi gesang lan pejah menika kuaosipun Allah Subhanahu wa Ta’ala. Menawi kapurih milih gesang ingkang sekeca lan pejah husnul khatimah kalian gesang rekaos lan pejah su’ul khatimah mesthi kita badhe milih gesang ingkang sekeca lan pejah husnul khatimah. Ananging kangge nggayuh kawontenan kados kala wau mboten gampil, kedah mawi ikhtiyar lan mbudidaya amrih saenipun.

Rasulullah nate paring pangendikan dawuh:

نِعْمَتَانِ مَغْبُوْنٌ فِيْهِمَا كَثِيْرٌ مِنَ النَّاسِ اَلصِّحَةُ وَالْفَرَاغُ

“Ana rong kanikmatan kang kerep dilalekake dening akehe manungsa, yaiku kesehatan lan wektu longgar.” (HR. Al-Bukhari: 6412, at-Tirmidzi: 2304, Ibnu Majah: 4170)

Pemerintah Indonesia lumantar Kementerian Kesehatan anggadahi gerakan ingkang naminipun GERMAS. Napa niku GERMAS? Germas punika singkatan saking Gerakan Masyarakat Hidup Sehat, inggih punika minangka gerakan ingkang anggadahi tujuan kangge masyarakataken budaya hidup sehat sarta nilaraken pakulinan saha prilaku masyarakat ingkang kirang sehat. Gerakan menika dipun umumaken wiwit warsa 2015 kepengker.

Jama’ah Jum’ah Rahimakumullah

Babagan kesehatan Allah sampun paring pepenget kanthi wahyunipun saha lumantar  pangandikan Rasulullah Muhammad Shallallahu’alaihi wasallam wonten ing haditsipun,  kadosta :

الْمُؤْمِنُ الْقَوِىُّ خَيْرٌ وَأَحَبُّ إِلَى اللَّهِ مِنَ الْمُؤْمِنِ الضَّعِيفِ … (رواه مسلم)

“Wong mukmin kang kuat luwih becik lan luwih ditresnani dening Allah sangka wong mukmin kang apes…”   (HR. Muslim)

Maksudipun, bilih tiyang iman ingkang sehat ingkang anggadahi kekiyatan satemah nyebabaken trengginas, ethes, lan sregep ing ndalem aktivitas gesangipun punika langkung sae lan langkung dipun tresnani dening Allah,  kabanding kalian tiyang ingkang sakit-sakitan, ingkang nyebabaken aras-arasen, nglokro, males lan ringkih ing aktivitas gesangipun.

Para sedherek ingkang minulya

Kangge nglaksanakaken program Germas (Gerakan Masyarakat Hidup Sehat) paling mboten wonten 7 langkah minangka peranan penting saking pakulinan gaya gesang sehat ing masyarakat kangge nyegah saking macem-macem masalah kasarasan, inggih menika:

Sepisan, nindakaken Aktivitas Fisik

Prilaku pagesangan modern asring andamel kirangipun aktivitas fisik ingkang dipun sebabaken makarya punapa dene olahraga. Pendamelan saben dintenipun kathah ingkang kabantu kalian wontenipun teknologi saha sekedikipun wekdal awit kesibukan ingkang nyebabaken sami nglampahi gaya gesang ingkang mboten sehat. Germas punika ingkang anggadahi bagian garapan ing babagan ngutamakaken gerakan aktivitas fisik kangge ningkataken kulaitas kasarasanipun tiyang.

Kalih, Dhahar Buah lan Sayur

Kepinginan dhahar ingkang praktis lan eco sarwa instan ndadosaken kirangipun wekdal kangge dhahar buah lan sayur ingkang langkung sehat lan manfaat tumprap kasarasan. Pinten-pinten jenis dhaharan saha unjukan kadosta junk food lan minuman bersoda saenipun mboten dipun konsumsi. Langkung sae menawi namung nambah jumlah konsumsi dhaharan saking buah saha sayur kemawon.

Tiga, Mboten Ngrokok

Ngrokok minangka kebiasaan ingkang kathah nuwuhaken pengaruh awon tumprap kasarasan. Mandheg saking ngrokok minangka saperangan penting saking gerakan gesang sehat. dampak rokok menika kajawi dhateng ingkang ngerokok piyambak ugi dhateng tiyang sak kiwa tengenipun. Menawi awerat kangge nilar pakulintenan menika saget nyuwun bantuan dhateng ahli hipnosis utawi mawi metode bantuan berhenti merokok minangka alternatif kangge mandheg saking kebiasaan awon kasebat. Germas punika mboten masalahaken babagan hukumipun haram menapa mekruh ananging sae lan awonipun pengaruh saking abluk rokok punika.

Rasulullah sampun paring pepenget kanthi sabdanipun:

لاَ ضَرَارَ وَ لاَ ضِرَارَ

“Ora oleh (nyebabake) bahaya lan ora oleh uga nyilakakake (wong liya).” (HR. Ibnu Majah, kitab al-Ahkam, no. 2340).

Sekawan, Mboten Ngomsumsi Minuman Beralkohol

Minuman beralkohol anggadahi efek awon kados dene ngrokok. Sageet paring efek tumrap kasarasan piyambakipun hingga efek sosial dhateng tiyang sanes. Allah berfirman:

يَسۡ‍َٔلُونَكَ عَنِ ٱلۡخَمۡرِ وَٱلۡمَيۡسِرِۖ قُلۡ فِيهِمَآ إِثۡمٞ كَبِيرٞ وَمَنَٰفِعُ لِلنَّاسِ وَإِثۡمُهُمَآ أَكۡبَرُ مِن نَّفۡعِهِمَاۗ

Artosipun: “Dheweke padha takon marang sira babagan khamr lan totohan. Dhawuha: “Karo-karone khamr lan totohan iku mengku dosa gedhe lan pira-pira manfa’at kanggo manungsa, nanging dosane luwih gedhe ketimbang manfa’ate…” (QS. Al-Baqarah: 219).

Kaping Gangsal, Ngawontenaken Cek Kasarasan Periodik

Salah satunggalipun perangan saking artos Germas minangka gerakan masyarakat hidup sehat inggih punika langkung sae ngatur kasarasan. Ing antawisipun kanthi ngawontenaken cek kesehatan sacara rutin lan mboten namung nalika sakit anggenipun tindak dhateng griya sakit punapa dene puskesmas. Cara punika langkung gampil mangertosi wontenipun penyakit utawi babagan kasarasan langkung awal.

Nenemipun, Njagi Kebersihan Lingkungan

Perangan penting saking germas hidup sehat ugi gegayutan kalian ningkataken kualitas lingkungan, salah setunggalipun kanthi njagi resikipun lingkungan. Njagi resikipun lingkungan ing skala alitipun kadosta ing bale griya ngolah sampah, njagi resikipun griya lan lingkunganipun.

Kaping Pitunipun, Ngginakaken Kakus

Aspek sanitasi minangka perangan penting saking gerakan masyarakat hidup sehat salah setunggalipun inggih punika ngginakaken kakus minangka sarana mbucal BAB. Aktivitas bucal BAB sak njawinipun kakus saget ningkataken resiko nularipun macem-macem jenis penyakit sekaligus nurunaken kualitas lingkungan.

Mekaten khutbah kangge ningkataken kualitas gesang kita supados awak kita langkung manfaati tumprap pribadi punapa manfaati dhateng tiyang sanes, kanthi njagi kasarasan fisik punapa dene lingkungan kita.

Ing tundhanipun sumangga kita sami ndedonga mugi Allah Subhanahu wa Ta’ala paring kasaransan dhateng kita saha kaluwarga kita satemah saget ningkataken anggenipun ngibadah dhumateng Allah Subhanahu wata’ala. Aamiin  

بَارَكَ اللّٰهُ لِی وَلَكُمْ فَی الْقُرْآنِ الْعَظِيْمِ . وَنَفَعَنِی وَاِيَّاكُمْ بِمَافِيْهِ مِنَ الْأٰيَاتِ وَالذِّكْرِ الْحَكِيْمِ . وَتَقَبَّلَ مِنِّی وَمِنْكُمْ تِلَاوَتُهُ اِنَّهُ هُوَالسَّمِيْعُ الْعَلِيْمَ.  وَقُلْ رَبِّ اغْفِرْوَارْحَمْ وَاَنْتَ حَيْرُالرَّحِمِيْنَ